நீர்த்துளி

தான்தவழும் தளத்தோடு சற்றேனும் ஒட்டுணராது

தன்தனித் தன்மையால் உருண்டோடிக் களித்தாங்கே

வானின்று வருமொளியைப் பற்றாமல் எதிரொளிக்கும்

சாமானிய நீர்த்துளியும் வைரமென ஒளிர்வதுபோல்

தாமிருக்கும் நிலையோடு ஒன்றாமல் எக்கணமும்

ஊனுற்ற உடல்கடந்த ஆன்மஞானம் தனைவிழைந்து

வரும்பொருள் பற்றாமல் உரியவர்க்கு வழங்குமன்பர்

அரும்பொருள் ஆசியால் வெற்றிபெற் றொளிர்ந்திடுவர் !